Nadat die H5N2-voëlgriepvirus die volstruisbedryf getref het, is die bedryf meer as die helfte kleiner.
Die volstruisbedryf is sedert April 2011 onder enorme druk ná ’n uitbreking van die H5N2-voëlgriep-virus ’n verbod op die uitvoer van volstruisvleis na die Europese Unie (EU) tot gevolg gehad het. Die bedryf is nou meer as die helfte kleiner as wat dit drie jaar gelede was.
Mnr. Charl du Plessis, ’n verteenwoordiger van die Volstruisbesigheidskamer (VBK), sê die vere en velle behaal tans rekordhoë pryse. Die vraag na volstruisprodukte bly toeneem, maar die kleiner mark beteken minder voorraad is beskikbaar.
Die vleisbedryf in die sektor trek egter swaar, met die uitvoer van vars vleis wat verbied word. Du Plessis sê die bedryf het begin om vleisprodukte teen hoë hitte te verwerk en het tans groot uitdagings om dié vleis aanlokliker vir verbruikers te maak. Hittebehandelde vleis mag wél uitgevoer word.
Net 400 geregistreerde plase
Voor die uitbreking was meer as 800 volstruisplase in die land geregistreer om hul produkte na die EU uit te voer. Sowat 400 plase was verlede jaar geregistreer en Du Plessis sê hulle is bekommerd oor dié afname.
Tydens ’n handelsontwikkelings-strategiekonferensie het Du Plessis ’n versoek aan die staat gerig om hulp ten einde ’n balans tussen dieregesondheid en ekonomie in die bedryf te bewerkstellig. “Die departement (van landbou) volg soms ’nbaie gefokusde benadering tot dieregesondheid in die bedryf, wat beteken dat die ekonomiese sy van sake verlore gaan. Dit gaan alles oor risikobestuur, en kommersiële oplossings moet gevind word,” aldus Du Plessis.
Die Departement van Landbou, Bosbou en Visserye en Agbiz het die konferensie aangebied. Du Plessis het sy dank uitgespreek vir die steun wat hulle van diédepartement en die Departement van Handel en Nywerheid ontvang.
